ამ სტატიაში ორი რამ განვიხილოთ, რომლებსაც ხშირად ურევენ ერთმანეთში: რა სჭირდება ვიზას თბილისში და რა სჭირდება ბინადრობას უკვე პოლონეთში. ეს ორი სხვადასხვა პროცედურაა, სხვადასხვა მოთხოვნებით თარგმანზე, და მათი აღრევა ორმაგ ხარჯს იწვევს.
მნიშვნელოვანი დათქმა: მოთხოვნები იცვლება და კონკრეტული საელჩოსა თუ სავიზო ცენტრის ინსტრუქცია ყოველთვის უპირატესია ამ ტექსტზე. აქ ის ლოგიკაა აღწერილი, რომელსაც პროცესი მიჰყვება.
ორი ტიპის სამუშაო ნებართვა
სანამ ვიზაზე შეიტანთ განაცხადს, დამსაქმებელმა პოლონეთში უნდა მოგიმზადოთ სამუშაო ნებართვა. ორი ძირითადი ტიპია და მათ თარგმანის მხრივ სხვადასხვა შედეგი აქვთ.
Oswiadczenie (განცხადება)
- მოკლევადიანი მუშაობისთვის
- ჩვეულებრივ სტანდარტული ან ორენოვანი ფორმაა
- საელჩოსთვის თარგმნა ხშირად საჭირო არ არის
- თქვენთვის შინაარსის გაგება მაინც სასარგებლოა
- ითარგმნება მაშინ, თუ ბანკი ან სხვა უწყება ითხოვს
Zezwolenie (ნებართვა, ტიპი A)
- გრძელვადიანი მუშაობისთვის
- უფრო ვრცელი დოკუმენტია, პირობების ჩამონათვალით
- ხშირად ღირს პოლონურიდან ქართულად თარგმნა
- იქ წერია თქვენი პოზიცია, ანაზღაურება და პირობები
- სწორედ ეს არის ის დოკუმენტი, რომელიც აუცილებლად უნდა წაიკითხოთ
რა უნდა შეამოწმოთ ნებართვაში
- პოზიციის დასახელება - ემთხვევა თუ არა შეთანხმებულს
- ანაზღაურების ოდენობა და პერიოდულობა
- სამუშაო ადგილის მისამართი
- ნებართვის მოქმედების ვადა
- თქვენი სახელი პასპორტის დაწერილობით
ერთი პრაქტიკული რჩევა: Zezwolenie-ს თარგმნა ფორმალურად ხშირად სავალდებულო არ არის, მაგრამ ღირს. სწორედ ამ დოკუმენტში წერია, რაზე ხართ დაქირავებული და რა პირობებით. თუ ჩამოსვლის შემდეგ აღმოჩნდება, რომ რეალური პირობები სხვაა, ეს ქაღალდი თქვენი ერთადერთი არგუმენტია.
რომელი საბუთები ითარგმნება პოლონურად
ვიზის ეტაპზე, თბილისში, ჩამონათვალი შედარებით მოკლეა და ბევრად დამოკიდებულია იმაზე, რა პოზიციაზე მიდიხართ.
პროფესიული სერტიფიკატები და დიპლომი. თუ რეგულირებულ პროფესიაზე მიდიხართ - მძღოლი, შემდუღებელი, ელექტრიკოსი, ექთანი, მზარეული - კვალიფიკაციის დამადასტურებელი საბუთები ჩვეულებრივ ითარგმნება. აქ კრიტიკულია პროფესიის დასახელების ზუსტი შესატყვისი: პოლონურ სისტემას საკუთარი კლასიფიკატორი აქვს. ნასამართლეობის ცნობა. ყველა პოზიციაზე არ მოითხოვება, მაგრამ გარკვეული სფეროებისთვის - განსაკუთრებით ბავშვებთან, ხანდაზმულებთან, დაცვასა და ფინანსებში - თითქმის ყოველთვის. ამ დოკუმენტს, როგორც წესი, აპოსტილიც სჭირდება. პასპორტი. თავად საელჩოს იშვიათად სჭირდება, მაგრამ პოლონური ბანკი, დამსაქმებელი ან PESEL-ის მიღება ხშირად ითხოვს. დეტალები: პასპორტის თარგმნა. ოჯახური დოკუმენტები. მხოლოდ იმ შემთხვევაში, თუ ოჯახთან ერთად მიდიხართ ან მოგვიანებით გეგმავთ მათ ჩაყვანას. მაშინ საჭიროა ქორწინების და დაბადების მოწმობები, აპოსტილით.Karta Pobytu - აქ წესები იცვლება
ეს ყველაზე მნიშვნელოვანი ნაწილია და სწორედ ის, რაზეც ხალხი ორჯერ იხდის.
ვიზისთვის, თბილისში, ჩვენი ნოტარიულად დამოწმებული თარგმანი ჩვეულებრივ სრულიად საკმარისია. მაგრამ როცა უკვე პოლონეთში ხართ და ბინადრობის ბარათს - Karta Pobytu - იღებთ, ადგილობრივი უწყება (Urzad) ხშირად ითხოვს თარგმანს, რომელიც შესრულებულია პოლონეთში მომუშავე ნაფიცი თარჯიმნის (tlumacz przysiegly) მიერ.
ეს პოლონეთის შიდა წესია და ჩვენ მას ვერ შევცვლით. პრაქტიკული დასკვნა ასეთია: არ გადაიხადოთ წინასწარ ნოტარიულ თარგმანზე იმ დოკუმენტებისთვის, რომლებიც მხოლოდ Karta Pobytu-სთვის გჭირდებათ - ისინი იქ მაინც თავიდან ითარგმნება.
რა ღირს მაინც თბილისში გაკეთება: თავად ქართულ დოკუმენტებზე აპოსტილის დადება. აპოსტილი მხოლოდ გამცემ ქვეყანაში ისმება, ანუ პოლონეთში ამას ვეღარ გააკეთებთ. ამიტომ წასვლამდე აუცილებლად აპოსტილიანი დედნები აიღეთ - მაშინაც კი, თუ თარგმანს იქ გააკეთებთ.
სახელების დაწერილობა - ყველაზე ხშირი ხარვეზი
პოლონურ მიმართულებაზე ყველაზე ხშირი პრობლემა ტერმინოლოგია არ არის - ის სახელის დაწერილობაა. ქართული სახელი პოლონურ დოკუმენტებში რამდენიმენაირად შეიძლება გადმოვიდეს, განსაკუთრებით მაშინ, როცა ერთ დოკუმენტს დამსაქმებელი წერს, მეორეს ჩვენ ვთარგმნით, მესამეს კი პოლონური უწყება ავსებს.
წესი მარტივია: ყველგან ზუსტად ისე, როგორც პასპორტშია ლათინურად. არა როგორც პოლონურად ჟღერს, არა როგორც დამსაქმებელმა დაწერა, არამედ როგორც პასპორტშია. თუ დამსაქმებლის დოკუმენტში სახელი სხვანაირად წერია, ეს ჩვენთან თარგმნამდე უნდა გაირკვეს, არა შემდეგ.
ჩვენთან თქვენი დაწერილობა პირველივე შეკვეთაზე ფიქსირდება და ყველა შემდეგ დოკუმენტში იმავე ფორმით გამოიყენება, თუნდაც წლების შემდეგ - მაშინაც კი, როცა ოჯახის წევრების საბუთებს მოგვიტანთ.
რა დაგჭირდებათ ჩასვლის შემდეგ
ვიზა პროცესის დასაწყისია და არა დასასრული. პოლონეთში ჩასვლის შემდეგ რამდენიმე პროცედურა გელოდებათ და თითოეულს საკუთარი დოკუმენტური მოთხოვნა აქვს.
PESEL - საიდენტიფიკაციო ნომერი, რომლის გარეშეც ბანკი, ექიმი და საგადასახადო თითქმის არ მუშაობს. მისთვის ჩვეულებრივ პასპორტი და სამუშაო დოკუმენტებია საჭირო, ზოგჯერ დაბადების მოწმობაც. საბანკო ანგარიში - ბანკები ხშირად ითხოვენ დამსაქმებლის დოკუმენტს და ზოგჯერ მის თარგმანს, თუ ის ქართულადაა. Karta Pobytu - თუ ერთ წელზე მეტ ხანს რჩებით. სწორედ აქ ითხოვს Urzad ადგილობრივი ნაფიცი თარჯიმნის თარგმანს, როგორც ზემოთ აღინიშნა. ოჯახის ჩაყვანა - ცალკე პროცედურაა და მას აპოსტილიანი ქორწინების და დაბადების მოწმობები სჭირდება. ეს ის ეტაპია, სადაც ადამიანები ყველაზე ხშირად აღმოჩნდებიან ჩიხში, რადგან აპოსტილი საქართველოში დარჩა და თავად უკვე პოლონეთში არიან.ამიტომ ჩვენი სტანდარტული რჩევა პოლონეთში მიმავალს ასეთია: წასვლამდე აიღეთ და აპოსტილით დაამოწმეთ ყველა ის დოკუმენტი, რომელიც შესაძლოა დაგჭირდეთ - ნასამართლეობა, დაბადების მოწმობა, ქორწინების მოწმობა, დიპლომი. თარგმნა მოგვიანებითაც შეიძლება, აპოსტილი - არა.
პროცესი ნაბიჯ-ნაბიჯ
მიიღეთ ნებართვა დამსაქმებლისგან
Oswiadczenie ან Zezwolenie. მიიღებისთანავე წაიკითხეთ ან გამოგვიგზავნეთ თარგმნად - პოზიცია, ანაზღაურება და ვადა იქ წერია.
გაარკვიეთ, რა ითარგმნება ვიზისთვის
დამოკიდებულია პოზიციაზე. გამოგვიგზავნეთ სავიზო ცენტრის ჩამონათვალი და გეტყვით, რომელ საბუთს სჭირდება თარგმანი და რომელს აპოსტილიც.
აპოსტილი ჯერ, თარგმანი მერე
ჯერ აპოსტილი: ნასამართლეობის ცნობაზე - შსს მომსახურების სააგენტოში, ოჯახურ მოწმობებზე - იუსტიციის სახლში. შემდეგ თარგმანი უკვე აპოსტილიან დოკუმენტზე.
აპოსტილიანი დედნები თან წაიღეთ
მაშინაც კი, თუ თარგმანს პოლონეთში გააკეთებთ Karta Pobytu-სთვის. აპოსტილი მხოლოდ საქართველოში ისმება და მისი გარეშე იქ ჩიხში აღმოჩნდებით.
ვადები და სად იკარგება დრო
პოლონური ენის თარჯიმნები საქართველოში ინგლისურსა და რუსულზე ნაკლებია, ამიტომ პოლონურ თარგმანზე ვადა ჩვეულებრივ ერთი-ორი სამუშაო დღეა და არა იმავე დღეს. ეს დაგეგმვისას უნდა გაითვალისწინოთ.
რეალურად დრო აპოსტილზე იკარგება. ნასამართლეობის ცნობის აღება, შემდეგ მასზე აპოსტილის დადება - ეს ორი ცალკე პროცედურაა და იმავე დღეს არ სრულდება. თუ სავიზო ცენტრში ჩანიშვნა უკვე გაქვთ, უკუთვლით დაგეგმეთ და დაიწყეთ ცნობის აღებით.
ფასი შეთანხმებით განისაზღვრება მასალის ნახვის შემდეგ და შეკვეთის დაწყებამდე ფიქსირდება. ორიენტირები: თარგმნის ფასები. სასწრაფო რეჟიმი ცალკე დანამატია და მხოლოდ თქვენი თხოვნით ირთვება.
პოლონეთში მიდიხართ სამუშაოდ? გამოგვიგზავნეთ ნებართვის ფოტო და სავიზო ცენტრის ჩამონათვალი - გეტყვით, რა ითარგმნება, რას სჭირდება აპოსტილი და რა ვადაში.
დარეკვა: 501 113 200ხშირად დასმული კითხვები
Oswiadczenie უნდა ვთარგმნო?
საელჩოსთვის ჩვეულებრივ არა - ის სტანდარტული ან ორენოვანი ფორმაა. თარგმნა ღირს მაშინ, თუ თავად გინდათ ზუსტად გაიგოთ პირობები, ან თუ პოლონური ბანკი, PESEL-ის მიღება ან სხვა უწყება ამას ითხოვს. Zezwolenie-ს შემთხვევაში კი თარგმნა თითქმის ყოველთვის სასარგებლოა, რადგან იქ დეტალური პირობებია.
ნასამართლეობის ცნობას აპოსტილი სჭირდება?
პოზიციაზეა დამოკიდებული. ბავშვებთან, ხანდაზმულებთან, დაცვასა და ფინანსებთან დაკავშირებულ სამუშაოებზე თითქმის ყოველთვის. სხვა შემთხვევებში ხშირად არა. ზუსტი პასუხი სავიზო ცენტრის ან დამსაქმებლის ჩამონათვალშია - გამოგვიგზავნეთ ეს ტექსტი და გეტყვით.
თბილისში გავაკეთო თარგმანი თუ პოლონეთში?
ვიზისთვის - თბილისში, ჩვენი ნოტარიულად დამოწმებული თარგმანი ჩვეულებრივ საკმარისია. Karta Pobytu-სთვის - ხშირად პოლონეთში, ადგილობრივი ნაფიცი თარჯიმნის მიერ, რადგან Urzad სწორედ ამას ითხოვს. ამიტომ ორი პროცედურა ცალ-ცალკე დაგეგმეთ და ორჯერ არ გადაიხადოთ.
აპოსტილი პოლონეთში შემიძლია დავადო?
არა. აპოსტილი მხოლოდ იმ ქვეყანაში ისმება, რომელმაც დოკუმენტი გასცა - ქართულ დოკუმენტზე მხოლოდ საქართველოში. ეს ყველაზე ძვირადღირებული შეცდომაა: ადამიანი მიდის, მერე აღმოაჩენს, რომ აპოსტილი სჭირდება, და ან უკან ბრუნდება, ან ნდობით აღჭურვილ პირს მინდობილობით აკეთებინებს.
დიპლომი უნდა ვთარგმნო, თუ ფიზიკურ სამუშაოზე მივდივარ?
თუ პოზიცია რეგულირებული პროფესიაა - მძღოლი, შემდუღებელი, ელექტრიკოსი, სამედიცინო პერსონალი - მაშინ კვალიფიკაციის დოკუმენტი ჩვეულებრივ საჭიროა. თუ არარეგულირებული სამუშაოა, ხშირად არ ითხოვენ. ეს დამსაქმებლის მოთხოვნაში და სავიზო ცენტრის ჩამონათვალში უნდა ნახოთ.
ოჯახის წევრები მოგვიანებით ჩამოვიყვანო. ახლა რა გავაკეთო?
წასვლამდე აიღეთ აპოსტილიანი ქორწინების და ბავშვების დაბადების მოწმობები. მაშინაც კი, თუ ისინი ჯერ არ გჭირდებათ. მიზეზი იგივეა: აპოსტილი მხოლოდ საქართველოში ისმება და მოგვიანებით მისი მოწესრიგება გაცილებით რთული და ძვირია, ვიდრე ახლა, როცა ჯერ კიდევ აქ ხართ.