დიპლომის თარგმნა ნოტარიული დამოწმებით

დიპლომის თარგმნა ერთ-ერთი ყველაზე მნიშვნელოვანი მომსახურებაა მათთვის, ვინც გეგმავს უცხოეთში სწავლას, მუშაობას, კვალიფიკაციის აღიარებას, ვიზის განაცხადის მომზადებას ან ოფიციალურ უწყებაში განათლების დამადასტურებელი დოკუმენტის წარდგენას. დიპლომი ადასტურებს თქვენს განათლებას, აკადემიურ ხარისხს, სპეციალობას და კვალიფიკაციას, ამიტომ მისი თარგმნა უნდა შესრულდეს ზუსტად, მკაფიო ფორმატით და ოფიციალური მოთხოვნების დაცვით.

დიპლომის თარგმნისას მნიშვნელოვანია არა მხოლოდ ტექსტის გადატანა ერთი ენიდან მეორეზე, არამედ ყველა მონაცემის სწორად გადმოტანა: სახელი და გვარი, სასწავლებლის დასახელება, სპეციალობა, კვალიფიკაცია, დიპლომის ნომერი, გაცემის თარიღი, აკადემიური ხარისხი, ბეჭდები, ხელმოწერები და დანართში მითითებული საგნები ან შეფასებები. თუ რომელიმე დეტალი არასწორად ითარგმნა, მიმღებმა უნივერსიტეტმა, დამსაქმებელმა ან სახელმწიფო უწყებამ შეიძლება დოკუმენტი უკან დააბრუნოს.

როდის გჭირდებათ დიპლომის თარგმნა?

დიპლომის თარგმნა ყველაზე ხშირად საჭიროა მაშინ, როცა განათლების დამადასტურებელი დოკუმენტი უნდა წარადგინოთ უცხოეთში. ეს შეიძლება იყოს უნივერსიტეტში ჩაბარება, მაგისტრატურის ან დოქტორანტურის განაცხადი, სტიპენდიის პროგრამა, სამუშაო ვიზა, პროფესიული ლიცენზია, კვალიფიკაციის აღიარება, საელჩოში წარდგენა ან უცხო ქვეყნის დამსაქმებლის მოთხოვნა.

სხვადასხვა ქვეყანასა და ორგანიზაციას განსხვავებული მოთხოვნები აქვს. ზოგ შემთხვევაში საკმარისია დიპლომის თარგმანი, ზოგჯერ საჭიროა ნოტარიულად დამოწმებული დიპლომის თარგმანი, ზოგჯერ კი აუცილებელია აპოსტილი ან დიპლომის დანართის თარგმნაც. ამიტომ მნიშვნელოვანია წინასწარ გაირკვეს, რა ფორმატს ითხოვს მიმღები მხარე.

• უცხოეთში სწავლის გაგრძელებისთვის;
• უნივერსიტეტში ან კოლეჯში ჩაბარებისთვის;
• მაგისტრატურის ან დოქტორანტურის განაცხადისთვის;
• სტიპენდიის პროგრამისთვის;
• სამუშაო ვიზის ან დასაქმებისთვის;
• პროფესიული კვალიფიკაციის აღიარებისთვის;
• საელჩოში ან საკონსულოში წარსადგენად;
• საერთაშორისო ორგანიზაციაში დოკუმენტების გასაგზავნად;
• ნოსტრაფიკაციის ან განათლების აღიარების პროცესისთვის, მათ შორის უცხოური დიპლომის აღიარებისთვის საქართველოში.

რა დოკუმენტები ითარგმნება დიპლომთან ერთად?

ხშირად მხოლოდ დიპლომის თარგმნა საკმარისი არ არის. უნივერსიტეტები, საელჩოები და უცხოეთის სახელმწიფო უწყებები ხშირად ითხოვენ დიპლომის დანართს, ნიშნების ფურცელს, აკადემიურ ცნობას, სასწავლო პროგრამის აღწერას ან სხვა დამატებით საგანმანათლებლო დოკუმენტს. ასეთ დროს უმჯობესია მთელი პაკეტი ერთად გამოგზავნოთ, რომ ყველა დოკუმენტის თარგმანი იმავე ან მომდევნო დღეს მიიღოთ.

დიპლომის დანართის თარგმნა განსაკუთრებით ყურადღებით უნდა შესრულდეს, რადგან მასში ხშირად მოცემულია საგნების ჩამონათვალი, კრედიტები, შეფასებები, სასწავლო წლები და აკადემიური დატვირთვა. ამ მონაცემების შეცდომის გარეშე გადატანა მნიშვნელოვანია, რადგან უნივერსიტეტი ან შეფასების ორგანიზაცია სწორედ ამ ინფორმაციაზე დაყრდნობით იღებს გადაწყვეტილებას.

• დიპლომი;
• დიპლომის დანართი;
• ნიშნების ფურცელი;
• აკადემიური ცნობა;
• სტუდენტის სტატუსის ცნობა;
• სილაბუსი ან სასწავლო პროგრამა;
• სერტიფიკატი;
• პროფესიული კვალიფიკაციის დამადასტურებელი დოკუმენტი;
• უნივერსიტეტის ან სკოლის მიერ გაცემული სხვა ოფიციალური დოკუმენტი.

ხარისხებისა და წოდებების ზუსტი თარგმნა

აკადემიური ხარისხი დიპლომის ყველაზე მგრძნობიარე ველია. „ბაკალავრი“ ითარგმნება როგორც Bachelor, „მაგისტრი“ - Master, „დოქტორი“ - Doctor ან PhD, თუმცა დიპლომზე ხარისხი ყოველთვის დარგთან ერთადაა ჩაწერილი: „ბიზნესის ადმინისტრირების ბაკალავრი“ არის Bachelor of Business Administration, „განათლების მაგისტრი“ - Master of Education. თუ უნივერსიტეტს კვალიფიკაციის ოფიციალური ინგლისური სახელწოდება აქვს და ის დიპლომის დანართშია მითითებული, თარგმანში სწორედ ამ ფორმას ვიყენებთ, რომ დიპლომი და დანართი ერთმანეთს სიტყვასიტყვით დაემთხვეს.

თარჯიმანი ხარისხს არც ამაღლებს და არც ამცირებს. თარგმანი გადმოსცემს იმას, რაც დოკუმენტზე წერია, ხოლო ეკვივალენტობას აღიარების ორგანო ადგენს: საქართველოში - განათლების ხარისხის განვითარების ეროვნული ცენტრი, საზღვარგარეთ - მიმღები ქვეყნის ENIC-NARIC ცენტრი ან უნივერსიტეტი. თუ თარგმანში ჩაწერილია „Master's Degree“ იქ, სადაც დედანში სხვა რამ წერია, ეს დოკუმენტის დაბრუნების საფუძველი ხდება.

საბჭოთა 5-წლიანი დიპლომები ცალკე ცოდნას მოითხოვს. საბჭოთა უმაღლესი სასწავლებელი აკადემიურ ხარისხს არ ანიჭებდა - დიპლომში ეწერა კვალიფიკაცია, მაგალითად „инженер-механик“ ან „историк, преподаватель истории“, ხშირად რუსულ ან ქართულ-რუსულ ენებზე. ასეთი დოკუმენტი ითარგმნება როგორც Diploma, კვალიფიკაციით Mechanical Engineer, და არა როგორც Master of Engineering. ხარისხთან კავშირს კანონი ადგენს: „უმაღლესი განათლების შესახებ“ საქართველოს კანონის 89-ე მუხლის მე-8 პუნქტით, 2010 წლის 1 სექტემბრამდე ერთსაფეხურიანი პროგრამის დასრულებისას გაცემული დიპლომი გათანაბრებულია მაგისტრის დიპლომთან, ხოლო მე-9 პუნქტით კანონის ძალაში შესვლამდე მოპოვებული მეცნიერებათა კანდიდატის ხარისხი - დოქტორის აკადემიურ ხარისხთან.

• „с отличием“ ან „წარჩინებით“ (ე.წ. წითელი დიპლომი) - Diploma with Honours;
• 5-ბალიანი შეფასება („отлично“, „хорошо“, „удовлетворительно“) - Excellent, Good, Satisfactory, რიცხვითი ქულის შენარჩუნებით;
• „зачтено“ - Pass, ქულად გადაყვანის გარეშე;
• „кандидат наук“ - Candidate of Sciences, და არა PhD;
• სასწავლებლის სახელწოდება - ისე, როგორც გაცემის დღეს ერქვა, მიუხედავად შემდგომი სახელის შეცვლისა.

სტუდენტის სტატუსის, სარეკომენდაციო და სამოტივაციო წერილების თარგმნა

უცხოეთის უნივერსიტეტში განაცხადი იშვიათად შედგება მხოლოდ დიპლომისგან. სტანდარტულ პაკეტში შედის CV, სტუდენტის სტატუსის ცნობა, ერთი ან ორი სარეკომენდაციო წერილი და სამოტივაციო წერილი. TARGMANEBI ამ პაკეტს ერთ შეკვეთად ამუშავებს: ერთიანი ტერმინოლოგია ყველა დოკუმენტისთვის და ერთი ვადა - იმავე ან მომდევნო დღეს.

ერთიან ტერმინოლოგიას პრაქტიკული მნიშვნელობა აქვს. თუ CV-ში ფაკულტეტი ერთნაირადაა ჩაწერილი, სტატუსის ცნობაში სხვანაირად, სარეკომენდაციო წერილში კი მესამენაირად, მიმღებ კომისიას ჩნდება კითხვა, ერთსა და იმავე პროგრამაზეა თუ არა საუბარი. ამიტომ უნივერსიტეტის, ფაკულტეტის, პროგრამისა და ხარისხის სახელწოდებებს ყველა დოკუმენტში ერთნაირად ვწერთ, დიპლომის თარგმანის მიხედვით.

• სტუდენტის სტატუსის ცნობა - ცნობას გაცემის თარიღი აქვს და საელჩოები თუ უნივერსიტეტები ხშირად ახლახან გაცემულს ითხოვენ. თარგმნამდე გადაამოწმეთ, რა ხანდაზმულობის ცნობას იღებს მიმღები მხარე;
• სარეკომენდაციო წერილი - პროფესორის ან დამსაქმებლის ხელმოწერილი ქართული წერილი ითარგმნება ხელმოწერისა და ბეჭდის აღნიშვნით. თუ უნივერსიტეტი წერილს მხოლოდ რეკომენდატორისგან იღებს, თარგმანს რეკომენდატორი თავად ტვირთავს პორტალზე;
• სამოტივაციო წერილი - ქართულად დაწერილ ტექსტს ვთარგმნით თქვენი არგუმენტებისა და სტილის შენარჩუნებით, ახალი ფაქტების დამატების გარეშე. თუ პროგრამა სიტყვების ლიმიტს აწესებს, ლიმიტი შეკვეთისას მიუთითეთ;
• CV - ვინარჩუნებთ თქვენს სტრუქტურას, ხოლო თუ პროგრამა Europass ფორმატს ითხოვს, თარგმანს მის ველებში ვაწყობთ.

პაკეტის ყველა დოკუმენტს ერთნაირი ფორმატი არ სჭირდება. დიპლომს, დანართსა და სტატუსის ცნობას ხშირად ნოტარიული დამოწმება სჭირდება, CV და სამოტივაციო წერილი კი, როგორც წესი, ჩვეულებრივი თარგმანით იგზავნება. ზედმეტი დამოწმება ზედმეტ ნაბიჯს ნიშნავს, ამიტომ შეკვეთისას გვითხარით, რას ითხოვს განაცხადის პორტალი. სრული სია: როგორ მოვამზადოთ საბუთები ევროპის უნივერსიტეტებში ჩასაბარებლად.

რა ენებზე ვთარგმნით დიპლომს?

TARGMANEBI გთავაზობთ დიპლომის თარგმნას ქართულიდან უცხო ენებზე და უცხო ენებიდან ქართულად. ყველაზე ხშირად მოთხოვნადია დიპლომის თარგმნა ინგლისურად, გერმანულად, რუსულად, იტალიურად, ფრანგულად, ესპანურად, თურქულად, ბერძნულად, უკრაინულად, პოლონურად, ჩეხურად, არაბულად, ჩინურად და სხვა ენებზე.

თუ დიპლომი გჭირდებათ გერმანიის უნივერსიტეტისთვის, შესაძლოა საჭირო იყოს გერმანული ან ინგლისური თარგმანი. იტალიაში სწავლის ან ოჯახის საკითხებისთვის ხშირად ითხოვენ იტალიურ თარგმანს. აშშ-ს, კანადის ან ბრიტანეთის მიმართულებით ყველაზე ხშირად გამოიყენება ინგლისური თარგმანი. კონკრეტული ენა ყოველთვის უნდა შეესაბამებოდეს მიმღები ორგანიზაციის მოთხოვნას.

სასწავლო დოკუმენტებში ხშირად სწორედ სახელისა და გვარის ჩაწერა ქმნის სირთულეს, რადგან სხვადასხვა ენას საკუთარი წესები აქვს. მაგალითად, უნგრული ენის თარჯიმნის გვერდზე აღწერილია სახელისა და გვარის თანმიმდევრობის საკითხი, ლიტვური ენის თარჯიმნის გვერდზე - უცხოური გვარების ფორმა, ხოლო რუმინული ენის თარჯიმნის გვერდზე - სასწავლო და სამოქალაქო დოკუმენტების გაფორმების თავისებურებები.

სჭირდება თუ არა დიპლომს ნოტარიული დამოწმება?

დიპლომის ნოტარიული დამოწმება ხშირად საჭიროა, როცა დოკუმენტი უცხოეთში უნდა წარადგინოთ. ნოტარიული თარგმანი ადასტურებს თარგმანის ოფიციალურ ფორმას და ბევრ შემთხვევაში აუცილებელია უნივერსიტეტისთვის, საელჩოსთვის, დამსაქმებლისთვის ან სახელმწიფო უწყებისთვის.

ნოტარიული დამოწმება განსაკუთრებით მნიშვნელოვანია მაშინ, როცა დიპლომი გამოიყენება სამართლებრივ ან ადმინისტრაციულ პროცესში: განათლების აღიარება, პროფესიული კვალიფიკაციის დადასტურება, ლიცენზიის მიღება, სამუშაო ვიზა ან უცხოეთში დასაქმება. ასეთ შემთხვევებში უბრალო თარგმანი შეიძლება საკმარისი არ იყოს. განსხვავება დეტალურად: დიპლომის ჩვეულებრივი და ნოტარიული თარგმანი.

ჩვენი გუნდი ყურადღებას აქცევს დიპლომის ფორმატს, სახელებისა და გვარების სწორ ტრანსლიტერაციას, სასწავლებლის დასახელების ზუსტ გადმოტანას, აკადემიური ტერმინების სწორ გამოყენებას და დოკუმენტის ყველა ოფიციალური ჩანაწერის სრულად ასახვას.

სჭირდება თუ არა დიპლომს აპოსტილი?

აპოსტილი არის დოკუმენტის საერთაშორისო გამოყენებისთვის დამოწმების ფორმა. დიპლომის შემთხვევაში აპოსტილის საჭიროება დამოკიდებულია იმ ქვეყანაზე, სადაც დოკუმენტი უნდა წარადგინოთ. ზოგჯერ აპოსტილი საჭიროა ორიგინალ დიპლომზე, ზოგჯერ დიპლომის ასლზე, ზოგჯერ ნოტარიულად დამოწმებულ თარგმანზე, ხოლო ზოგ შემთხვევაში საკმარისია მხოლოდ ნოტარიული თარგმანი.

თუ დიპლომი გჭირდებათ უნივერსიტეტისთვის, საელჩოსთვის ან განათლების აღიარებისთვის, აუცილებლად გადაამოწმეთ მათი მოთხოვნები. თუ გაქვთ მოთხოვნების სია, შეგიძლიათ გამოგვიგზავნოთ და დაგეხმარებით გაიგოთ, დიპლომს სჭირდება თუ არა აპოსტილი, ნოტარიული დამოწმება ან დიპლომის დანართის თარგმნაც.

აპოსტილი საგანმანათლებლო დოკუმენტებზე

საქართველოში აპოსტილს რამდენიმე უწყება სვამს და რომელი მათგანი, დოკუმენტის ტიპზეა დამოკიდებული. დიპლომზე, დიპლომის დანართზე, ატესტატსა და ნიშნების ფურცელზე აპოსტილის კომპეტენტური ორგანოა განათლების ხარისხის განვითარების ეროვნული ცენტრი. განაცხადს იუსტიციის სახლში წარადგენთ, თუმცა იუსტიციის სახლი საგანმანათლებლო დოკუმენტს თავად არ ამოწმებს: განაცხადი ელექტრონულად იგზავნება ცენტრში, რომელიც ამოწმებს დოკუმენტის ნამდვილობას და იღებს გადაწყვეტილებას აპოსტილის შესახებ.

ნამდვილობის შემოწმებისას ცენტრი ადასტურებს, რომ დოკუმენტი გასცა უფლებამოსილმა დაწესებულებამ და იმ პირზე, ვინც მასშია მითითებული. ამიტომ საგანმანათლებლო დოკუმენტზე აპოსტილი იმავე დღეს არ კეთდება. საბჭოთა პერიოდის ან ლიკვიდირებული დაწესებულების დიპლომის შემოწმებას შეიძლება მეტი დრო დასჭირდეს - ასეთ შემთხვევაში დაგეგმეთ აპოსტილი deadline-მდე რამდენიმე კვირით ადრე.

• აპოსტილი დიპლომზე - ისმება ორიგინალ საგანმანათლებლო დოკუმენტზე ცენტრის მიერ ნამდვილობის შემოწმების შემდეგ;
• აპოსტილი ნოტარიულ თარგმანზე - ნოტარიულ აქტზე აპოსტილს სახელმწიფო სერვისების განვითარების სააგენტო სვამს. ის ადასტურებს ნოტარიუსის ხელმოწერასა და ბეჭედს და არა დიპლომის ნამდვილობას.

სწორი თანმიმდევრობა ჩვეულებრივ ასეთია: ჯერ აპოსტილი ორიგინალზე, შემდეგ თარგმანი, რომელშიც აპოსტილის ტექსტიც ითარგმნება, ბოლოს ნოტარიული დამოწმება. თუ დიპლომს ჯერ თარგმნით და აპოსტილს შემდეგ დაამატებთ, აპოსტილი თარგმანში აღარ აისახება და თარგმანის ხელახლა მომზადება დაგჭირდებათ. ზოგი ქვეყანა ორივე აპოსტილს ითხოვს - დიპლომზეც და ნოტარიულ თარგმანზეც, ამიტომ მიმღების მოთხოვნები შეკვეთამდე გადაამოწმეთ. დეტალები იხილეთ აპოსტილის გვერდზე და გზამკვლევში როგორ გავაკეთოთ აპოსტილი დიპლომსა და ნიშნების ფურცელზე.

დიპლომის თარგმნა გერმანიისთვის, იტალიისთვის, აშშ-სთვის და სხვა ქვეყნებისთვის

დიპლომის თარგმნა ხშირად უკავშირდება კონკრეტულ ქვეყანას. მაგალითად, გერმანიაში სწავლისთვის ან კვალიფიკაციის აღიარებისთვის დოკუმენტები უნდა იყოს მომზადებული უნივერსიტეტის ან შესაბამისი უწყების მოთხოვნის მიხედვით. იტალიაში სწავლის, ოჯახის გაერთიანების ან ბინადრობის პროცესში შეიძლება საჭირო გახდეს დიპლომის იტალიური თარგმანი. აშშ-სა და ბრიტანეთისთვის ხშირად გამოიყენება ინგლისური თარგმანი, ხოლო პოლონეთის, ჩეხეთის, თურქეთის ან სხვა ქვეყნების შემთხვევაში მოთხოვნები შეიძლება განსხვავდებოდეს.

ამიტომ დიპლომის თარგმნის შეკვეთისას სასურველია მიუთითოთ არა მხოლოდ ენა, არამედ ისიც, სად უნდა წარადგინოთ დოკუმენტი. ეს გვეხმარება სწორად განვსაზღვროთ, დაგჭირდებათ თუ არა ნოტარიული დამოწმება, დანართის თარგმნა, აპოსტილის კონსულტაცია ან სხვა დამატებითი ნაბიჯი.

როგორ ხდება დიპლომის თარგმნის შეკვეთა?

დიპლომის თარგმნის შეკვეთა შესაძლებელია ონლაინ ან ოფისში. შეგიძლიათ გამოგვიგზავნოთ დიპლომის და დანართის ფოტო ან სკანი WhatsApp-ზე, ელფოსტაზე ან საიტის შეკვეთის ფორმით. დოკუმენტების მიღების შემდეგ ვამოწმებთ მოცულობას, ენას, დამოწმების საჭიროებას. თარგმანი მზადდება იმავე ან მომდევნო დღეს.

• გამოგვიგზავნეთ დიპლომის ფოტო ან სკანი;
• თუ გაქვთ დანართი ან ნიშნების ფურცელი, ისიც გამოაგზავნეთ;
• მიუთითეთ სათარგმნი ენა;
• გვითხარით, რომელ ქვეყანაში ან ორგანიზაციაში უნდა წარადგინოთ დოკუმენტი;
• მონიშნეთ, გჭირდებათ თუ არა ნოტარიული დამოწმება;
• თუ გაქვთ deadline, წინასწარ შეგვატყობინეთ;
• მიიღეთ თარგმანი იმავე ან მომდევნო დღეს.

ოფიციალური თარგმნისთვის მნიშვნელოვანია, რომ დოკუმენტის ყველა ნაწილი მკაფიოდ იკითხებოდეს. თუ სკანი დაბურულია, ბეჭედი არ ჩანს ან დიპლომის დანართი სრულად არ არის გამოგზავნილი, შეიძლება საჭირო გახდეს დამატებითი ფაილის გამოგზავნა. ეს დაგვეხმარება თავიდან ავიცილოთ შეცდომები და თარგმანი მომზადდეს ზუსტად.

რამდენ ხანში მზადდება დიპლომის თარგმანი?

დიპლომის თარგმანი მზადდება იმავე ან მომდევნო დღეს. იგივე ვადა ვრცელდება დიპლომის დანართზე, ნიშნების ფურცელსა და სხვა სასწავლო დოკუმენტებზე, რომლებსაც დიპლომთან ერთად გამოგზავნით.

აპოსტილის ვადა თარგმანის ვადაში არ შედის, რადგან აპოსტილს სახელმწიფო უწყება სვამს. თუ დოკუმენტი გჭირდებათ კონკრეტული deadline-ისთვის, შეკვეთისას მიუთითეთ თარიღი.

დიპლომის თარგმნა ონლაინ

დიპლომის თარგმნის შეკვეთა ონლაინაც შეგიძლიათ. ეს განსაკუთრებით მოსახერხებელია სტუდენტებისთვის, ემიგრანტებისთვის, სამუშაოს მაძიებლებისთვის და მათთვის, ვინც დოკუმენტებს უცხოეთში გასაგზავნად ამზადებს. უბრალოდ გამოგვიგზავნეთ დიპლომის და დანართის ფოტო ან სკანი WhatsApp-ზე ან ელფოსტაზე და თარგმანს მიიღებთ იმავე ან მომდევნო დღეს.

ონლაინ შეკვეთა არ ამცირებს ხარისხს. დოკუმენტები მუშავდება იმავე სიზუსტით, როგორც ოფისში მოტანილი ფაილები. საჭიროების შემთხვევაში შეგიძლიათ მიიღოთ ელექტრონული ვერსია, ხოლო ნოტარიული დამოწმების შემთხვევაში შეთანხმებით ბეჭდური ვერსიაც.

რატომ უნდა აირჩიოთ TARGMANEBI?

დიპლომის თარგმნა საჭიროებს აკადემიური ტერმინოლოგიის სწორ ცოდნას, ოფიციალური ფორმატის დაცვას და დეტალების სიზუსტეს. TARGMANEBI მუშაობს საგანმანათლებლო, პირად, იურიდიულ, სამედიცინო, ტექნიკურ და ფინანსურ დოკუმენტებთან, ამიტომ კარგად გვესმის, რა მნიშვნელობა აქვს განათლების დამადასტურებელი დოკუმენტების სწორად მომზადებას.

• ვმუშაობთ 14-ზე მეტ ენაზე;
• შესაძლებელია დიპლომის ნოტარიული დამოწმება;
• ითარგმნება დიპლომის დანართი და ნიშნების ფურცელი;
• გთავაზობთ აპოსტილის კონსულტაციას;
• შეგიძლიათ დოკუმენტი გამოგზავნოთ ონლაინ;
• იცავთ კონფიდენციალურობას;
• თარგმანი მზადდება იმავე ან მომდევნო დღეს;
• ვმუშაობთ თბილისში, ბათუმში, ქუთაისში და ონლაინ მთელი საქართველოდან.

დიპლომის აღიარებისას მნიშვნელოვანია გამცემი დაწესებულების ოფიციალური სახელწოდება და შეფასების სისტემა. ცალკე გვერდებზეა აღწერილი კორეული და სლოვაკური სასწავლო დოკუმენტების თავისებურებები.

ხშირად დასმული კითხვები