რა საბუთები გჭირდებათ ბავშვთან ერთად საზღვარგარეთ სამოგზაუროდ?

ყოველ ზაფხულს და საახალწლო არდადეგებზე ერთი და იგივე კითხვები მეორდება: საკმარისია თუ არა ბავშვის პასპორტი, სჭირდება თუ არა მამას დედის თანხმობა, შეუძლია თუ არა ბებიას შვილიშვილის წაყვანა უცხოეთში, და რომელ ენაზე უნდა იყოს თანხმობა. პასუხები ორ დონეზე იძებნება: რას ითხოვს საქართველოს კანონი საქართველოდან გასვლისას და რას ითხოვს დანიშნულების ქვეყანა, ტრანზიტის ქვეყანა და ავიაკომპანია.

ქვემოთ ჯერ ჩამოვთვლით ძირითად საბუთებს, შემდეგ კი სამ სცენარს: ორივე მშობელი, ერთი მშობელი და მესამე პირი. სტატიის ბოლოს არის მოკლე ჩამონათვალი, რომელიც გამგზავრებამდე ერთი კვირით ადრე უნდა გადაამოწმოთ.

ძირითადი საბუთები ყველა შემთხვევაში

• ბავშვის პასპორტი - ბავშვს საკუთარი პასპორტი სჭირდება. გადაამოწმეთ მისი მოქმედების ვადა: შენგენის ზონის ქვეყნები ითხოვენ, რომ პასპორტი მოქმედებდეს ზონიდან გამგზავრების დაგეგმილი თარიღიდან მინიმუმ 3 თვე, სხვა ქვეყნებს კი საკუთარი მოთხოვნა აქვთ;
• დაბადების მოწმობა - ადასტურებს, ვინ არიან ბავშვის მშობლები. განსაკუთრებით საჭიროა, თუ მშობელსა და ბავშვს სხვადასხვა გვარი აქვთ. უცხოეთში წარსადგენად ის ხშირად ითარგმნება: დაბადების მოწმობის თარგმნა;
• ვიზა - თუ დანიშნულების ქვეყანა საქართველოს მოქალაქეებს ვიზას სთხოვს, ბავშვსაც ცალკე ვიზა სჭირდება;
• სამგზავრო დაზღვევა - ზოგი ქვეყნის ვიზისთვის სავალდებულოა, სხვა შემთხვევაში კი რეკომენდებული;
• თანმხლები პირის საბუთები - მოქმედი პასპორტი და, საჭიროების შემთხვევაში, ვიზა.

ეს სია ყველა სცენარისთვის საერთოა. განსხვავება იწყება მაშინ, როცა ბავშვს ორივე მშობელი არ ახლავს.

სამი სცენარი: ვისი თანხმობაა საჭირო

განსაკუთრებული შემთხვევები

• ერთი მშობელი გარდაცვლილია - მეორე მშობლის თანხმობის ნაცვლად თან იქონიეთ გარდაცვალების მოწმობა და, საჭიროების შემთხვევაში, მისი თარგმანი;
• მშობლის უფლება შეზღუდულია ან ბავშვი ერთ მშობელთან ცხოვრობს სასამართლოს გადაწყვეტილებით - თან იქონიეთ სასამართლოს გადაწყვეტილება და მისი თარგმანი;
• დაბადების მოწმობაში მამა არ არის მითითებული - ამას თავად დაბადების მოწმობა ადასტურებს, ამიტომ მისი თარგმანი გამოგადგებათ;
• მშობლები ვერ თანხმდებიან - ნოტარიუსი დავას ვერ გადაწყვეტს. ასეთ საკითხს სასამართლო წყვეტს;
• მეორე მშობელი საზღვარგარეთაა - მას შეუძლია თანხმობა გააფორმოს საქართველოს საკონსულოში, ქართულ ენაზე, ან ადგილობრივ ნოტარიუსთან. მეორე შემთხვევაში, როგორც წესი, საჭიროა აპოსტილი ან ლეგალიზაცია და ქართული თარგმანი. დაწვრილებით: როგორ გამოვაგზავნოთ მინდობილობა უცხოეთიდან.

სასკოლო ექსკურსია, ბანაკი და სპორტული შეჯიბრი

ორგანიზებული ჯგუფით მგზავრობისას ბავშვს მშობლის ნაცვლად მასწავლებელი, მწვრთნელი ან ბანაკის ხელმძღვანელი ახლავს, ანუ ეს მესამე სცენარია. ასეთ შემთხვევაში:

• თანხმობაში დასახელებულია კონკრეტული თანმხლები პირი, არა მხოლოდ „სკოლა“ ან „კლუბი“;
• თუ თანმხლები შეიძლება შეიცვალოს, თანხმობაში ორი პირის ჩაწერაა შესაძლებელი, თითოეული სრული მონაცემებით;
• ორგანიზატორს ხშირად საკუთარი ჩამონათვალი აქვს - ითხოვეთ ის წინასწარ და შეადარეთ თანხმობის ტექსტს;
• თუ ჯგუფი რამდენიმე ქვეყანას გადის, ყველა ქვეყანა თანხმობაში უნდა ეწეროს.

ორგანიზატორები თანხმობის თარგმანს ხშირად ერთად უკვეთავენ მთელი ჯგუფისთვის. ასეთ დროს ყველა ბავშვის სახელს მის პასპორტთან ცალკე ვამოწმებთ, რადგან ჯგუფურ სიაში დაშვებული ერთი შეცდომა სწორედ იმ ბავშვს აჩერებს, ვისაც ეხება.

რას ამოწმებენ აეროპორტში

ავიაკომპანიის თანამშრომელი და მესაზღვრე ერთსა და იმავე ოთხ კითხვას სვამენ: არის თუ არა ბავშვის პასპორტი მოქმედი, ვინ ახლავს მას, ვინ არის ის ბავშვისთვის და არის თუ არა მისი თანხლების დადასტურება. ბოლო ორ კითხვას დაბადების მოწმობა და თანხმობა პასუხობს. ამიტომ დოკუმენტები ერთად, ერთ საქაღალდეში იქონიეთ, ორიგინალებითა და თარგმანებით, და არა ჩემოდანში, რომელიც უკვე ჩაბარებულია.

რა უნდა ეწეროს თანხმობაში

თანხმობას საზღვარზე და ავიაკომპანიის დახლთან ბავშვის პასპორტს ადარებენ, ამიტომ მასში უნდა იყოს:

• თანხმობის გამცემი მშობლის სრული მონაცემები;
• ბავშვის სახელი, გვარი, დაბადების თარიღი, პირადი ნომერი და პასპორტის ნომერი;
• თანმხლები პირის სახელი, გვარი და პასპორტის ნომერი, თუ ბავშვს მშობელი არ ახლავს;
• დანიშნულების და, საჭიროების შემთხვევაში, ტრანზიტის ქვეყნები;
• მგზავრობის პერიოდი - მცირე მარაგით, თუ ბილეთების გადადება შესაძლებელია.

თუ თანხმობის გაფორმების შემდეგ ბავშვს ახალი პასპორტი აუღეთ, თანხმობაში ძველი ნომერი დარჩება. ასეთ შემთხვევაში ჯობს თანხმობა ხელახლა გაფორმდეს. ტექსტის მომზადებაში დაგეხმარებით: განცხადება და თანხმობა ნოტარიულად.

როდის სჭირდება თანხმობას თარგმანი

ქართულ საზღვარზე ქართული თანხმობა თარგმანის გარეშე იკითხება. თარგმანი საჭიროა მაშინ, როცა თანხმობას ან დაბადების მოწმობას უცხოელი თანამშრომელი ამოწმებს: ავიაკომპანიის რეგისტრაციაზე, ტრანზიტის ქვეყანაში, დანიშნულების ქვეყნის საზღვარზე ან ვიზის განაცხადისას. უმეტესად ინგლისური თარგმანი საკმარისია, ზოგი ქვეყანა კი საკუთარ ენაზე ითხოვს.

თარგმანში ბავშვის სახელი ლათინურად ზუსტად ისე იწერება, როგორც პასპორტშია, თარიღებში კი თვე სიტყვით, რომ 03.07.2026 7 მარტად არ წაიკითხონ. თარგმანი ნოტარიულად მოწმდება, და თუ დანიშნულების ქვეყანა ითხოვს, აპოსტილიც ისმება. დაწვრილებით: მშობლის თანხმობის თარგმნა.

ჩამონათვალი გამგზავრებამდე ერთი კვირით ადრე

• ბავშვის პასპორტი მოქმედია და ვადა დანიშნულების ქვეყნის მოთხოვნას აკმაყოფილებს;
• ვიზა, თუ საჭიროა, უკვე მიღებულია;
• დაბადების მოწმობა და, საჭიროების შემთხვევაში, მისი თარგმანი თან გაქვთ;
• თანხმობაში ბავშვის პასპორტის მოქმედი ნომერი და თანმხლები პირის სწორი მონაცემები წერია;
• თანხმობაში ჩაწერილი პერიოდი მოიცავს მგზავრობის ორივე თარიღს;
• გადამოწმებულია დანიშნულების ქვეყნის, ტრანზიტის ქვეყნისა და ავიაკომპანიის მოთხოვნა;
• თარგმანი, თუ საჭიროა, ნოტარიულად დამოწმებულია;
• ყველა დოკუმენტის ასლი ტელეფონშიც გაქვთ.

თუ რომელიმე პუნქტი ბოლო დღეებში აღმოჩნდა საჭირო, თარგმანი მზადდება იმავე ან მომდევნო დღეს, ნოტარიული დამოწმებით.

როგორ შევუკვეთოთ თარგმანი

ხშირად დასმული კითხვები

დაკავშირებული გვერდები