კომპანიის ფინანსური ანგარიშგებების, ბრუნვისა და აუდიტის დასკვნების თარგმნა

ეს გვერდი კომპანიებისთვისაა: ფინანსური დირექტორებისთვის, ბუღალტრებისთვის, იურისტებისთვის, სტარტაპების დამფუძნებლებისთვის და საკონსულტაციო ფირმებისთვის, რომლებიც კლიენტის ფინანსურ პაკეტს უცხოელ მიმღებთან ამზადებენ. აქ ავხსნით, რას ვთარგმნით, როგორ ვმუშაობთ დიდ მოცულობაზე და როგორ ვიცავთ ინფორმაციას, რომელიც ჯერ საჯარო არ არის.

ზოგადი ინფორმაცია ფინანსური თარგმანის შესახებ, მათ შორის კერძო პირების საბუთები, იხილეთ გვერდზე ფინანსური თარგმანი. კორპორატიული თანამშრომლობის სხვა მიმართულებები - კომპანიებისთვის.

როდის სჭირდება კომპანიას ფინანსური თარგმანი

• ინვესტიცია და due diligence - ინვესტორი და მისი მრჩევლები ანგარიშგებას, აუდიტის დასკვნას, საგადასახადო დეკლარაციებსა და ძირითად ხელშეკრულებებს საკუთარ ენაზე კითხულობენ;
• უცხოური დედა კომპანია - შვილობილი კომპანიის ანგარიშგება კონსოლიდაციისთვის და ჯგუფის აუდიტორისთვის;
• საერთაშორისო დაფინანსება - სესხი უცხოური ბანკიდან ან საერთაშორისო საფინანსო ინსტიტუტიდან, გრანტი, ლიზინგი;
• ტენდერი - ფინანსური მდგომარეობის დადასტურება საერთაშორისო ტენდერზე;
• სტარტაპის რაუნდი - ფინანსური მოდელი, ბიუჯეტი, მენეჯმენტის ანგარიში და ბრუნვის დადასტურება უცხოელი ფონდისთვის;
• ფილიალი ან კომპანია უცხოეთში - ანგარიშგება და ამონაწერი რეესტრიდან უცხოურ რეგისტრატორთან ან ბანკში წარსადგენად;
• დავა და არბიტრაჟი - ფინანსური მტკიცებულება სასამართლოსთვის ან არბიტრაჟისთვის.

რას ვთარგმნით

• ფინანსური მდგომარეობის ანგარიშგება (ბალანსი);
• მოგებისა და ზარალის და სხვა სრული შემოსავლის ანგარიშგება;
• ფულადი სახსრების მოძრაობის ანგარიშგება;
• კაპიტალში ცვლილებების ანგარიშგება;
• ფინანსური ანგარიშგების განმარტებითი შენიშვნები;
• დამოუკიდებელი აუდიტორის დასკვნა და მენეჯმენტის ანგარიში;
• ანგარიშის ბრუნვის ამონაწერი და ბანკის ცნობები;
• მოგების გადასახადისა და დღგ-ის დეკლარაციები, ცნობა საგადასახადო დავალიანების არქონის შესახებ;
• ბიუჯეტი, ფინანსური მოდელი, საინვესტიციო მემორანდუმი, ბიზნეს გეგმის ფინანსური ნაწილი;
• სასესხო, საინვესტიციო და აქციონერთა ხელშეკრულებების ფინანსური პირობები.

ქართული კომპანიების ანგარიშგება, კატეგორიის მიხედვით, ბუღალტრული აღრიცხვის, ანგარიშგებისა და აუდიტის ზედამხედველობის სამსახურში (SARAS) წარედგინება და reportal.ge-ზე ქვეყნდება. ბევრი მათგანი IFRS-ის ან მცირე და საშუალო საწარმოების IFRS-ის მიხედვით მზადდება. ამიტომ ინგლისურ თარგმანში ვიყენებთ IFRS-ის ოფიციალურ სახელწოდებებს: Statement of Financial Position, Statement of Profit or Loss and Other Comprehensive Income, Statement of Cash Flows, Statement of Changes in Equity - და არა თავისუფალ ვარიანტებს, რომლებიც უცხოელ აუდიტორს დამატებით კითხვებს უჩენს.

აუდიტის დასკვნა: სადაც ერთი სიტყვა მოსაზრებას ცვლის

აუდიტის დასკვნა ფინანსური პაკეტის ყველაზე მგრძნობიარე გვერდია. მკითხველი პირველ რიგში აუდიტორის მოსაზრებას ეძებს, და მისი ტიპი ზუსტად უნდა გადავიდეს:

• არამოდიფიცირებული მოსაზრება (unmodified opinion) - ანგარიშგება ყველა არსებითი ასპექტით სამართლიანად ასახავს მდგომარეობას;
• პირობითი მოსაზრება (qualified opinion) - ანგარიშგება სამართლიანია, გარდა კონკრეტული საკითხისა;
• უარყოფითი მოსაზრება (adverse opinion) - ანგარიშგება არ ასახავს მდგომარეობას სამართლიანად;
• მოსაზრებაზე უარის თქმა (disclaimer of opinion) - აუდიტორმა საკმარისი მტკიცებულება ვერ მოიპოვა.

ამ ტერმინების აღრევა მიმღებისთვის კომპანიის სრულიად სხვა სურათს ქმნის. ასევე უცვლელად გადაგვაქვს დასკვნის სტრუქტურა: მოსაზრების საფუძველი, საქმიანობის უწყვეტობასთან დაკავშირებული არსებითი გაურკვევლობა, ყურადღების გამახვილება, აუდიტის ძირითადი საკითხები, ხელმძღვანელობისა და აუდიტორის პასუხისმგებლობა, აუდიტორული ფირმის რეკვიზიტები და ხელმომწერი აუდიტორი.

ციფრები, ცხრილები და Excel

ფინანსურ თარგმანში ციფრი ტექსტზე მნიშვნელოვანია. დიდი მოცულობის პაკეტზე ასე ვმუშაობთ:

• ფორმატი შენარჩუნებულია - Excel ფაილი Excel-ად ბრუნდება, ფორმულებითა და ფურცლებით; Word და PDF ანგარიშგება იმავე განლაგებით, სვეტებით და გვერდებით;
• ერთი ტერმინი ერთი მნიშვნელობით - სამუშაოს დაწყებამდე ვადგენთ ტერმინების გლოსარიუმს თქვენი ანგარიშთა გეგმის მიხედვით, და მას ვიყენებთ ყველა დოკუმენტში, მომდევნო წლების ანგარიშგებებშიც;
• შეჯერება - ვამოწმებთ, რომ შენიშვნებში მოცემული თანხები ძირითად ანგარიშგებას ემთხვევა, ხოლო ჯამები - დედნის ჯამებს;
• რიცხვების ჩანაწერი - ათასეულებისა და ათწილადების გამყოფები, უარყოფითი თანხები ფრჩხილებში და ერთეულები (ათასი ლარი, მილიონი ლარი) იწერება მიმღები ქვეყნის წესით;
• მეორე შემოწმება - თარგმანს მეორე სპეციალისტი ამოწმებს დედანთან, ციფრებზე ცალკე.

შეცდომები, რომლებსაც ფინანსური თარგმანის შემოწმებისას ვპოულობთ

ხშირად გვთხოვენ სხვა თარჯიმნის ან ავტომატური მთარგმნელის მიერ ნათარგმნი ანგარიშგების შემოწმებას, სანამ ის ინვესტორს ან აუდიტორს გაეგზავნება. ყველაზე ხშირი შეცდომები ასეთია:

• „შემოსავალი“ და „მოგება“ აღრეულია - revenue, income და profit სხვადასხვა მუხლია, და მათი აღრევა მოგება-ზარალის ანგარიშგებას აზრს უკარგავს;
• ერთი მუხლი სხვადასხვა სახელით - ბალანსში „trade receivables“, შენიშვნებში „accounts receivable“, აუდიტის დასკვნაში კი მესამე ვარიანტი. მკითხველი ფიქრობს, რომ სამი სხვადასხვა მუხლია;
• ერთეულები დაკარგულია - სათაურში „ათას ლარში“ არ ითარგმნა, და ცხრილი ათასჯერ მცირე კომპანიას აჩვენებს;
• უარყოფითი თანხები - ფრჩხილებში მოცემული ზარალი თარგმანში დადებით რიცხვად იქცა;
• შედარებითი პერიოდი - წინა წლის სვეტი მიმდინარე წლის სათაურით ითარგმნა;
• იურიდიული ფორმები - შპს, სს და ინდმეწარმე თარგმანში არათანმიმდევრულადაა გადმოტანილი, და მონათესავე მხარეების შენიშვნა ბუნდოვანი ხდება.

ასეთ შემოწმებაზე ვაბრუნებთ შესწორებულ ფაილს და ცვლილებების სიას, რომ თქვენმა ფინანსურმა გუნდმა ზუსტად დაინახოს, რა შეიცვალა და რატომ.

კონფიდენციალურობა და NDA

წლიური ანგარიშგება გამოქვეყნებამდე, საინვესტიციო მემორანდუმი, due diligence-ის მასალები და ბრუნვის ამონაწერები კომერციული საიდუმლოებაა. ამიტომ:

• ფაილების მიღებამდე ვაწერთ ხელს კონფიდენციალურობის შეთანხმებას (NDA) - თქვენი კომპანიის შაბლონით ან ჩვენით;
• დოკუმენტებზე წვდომა აქვთ მხოლოდ იმ თარჯიმნებსა და რედაქტორებს, ვინც თქვენს პროექტზე მუშაობს;
• ფაილებს ვიღებთ იმ არხით, რომელსაც თქვენი კომპანია იყენებს, მათ შორის data room-ით;
• ტექსტს არ ვტვირთავთ საჯარო ონლაინ მთარგმნელებში;
• სამუშაო ფაილები ინახება მაქსიმუმ ერთი თვე, შესწორებებისთვის, და შემდეგ იშლება. მოთხოვნისთანავე უფრო ადრეც წავშლით.

დაწვრილებით ჩვენი წესები: კონფიდენციალურობა.

დამოწმება და აპოსტილი

ინვესტორისა და დედა კომპანიისთვის საკმარისია თარგმანი ბიუროს ბეჭდითა და თარჯიმნის ხელმოწერით. უცხოური რეგისტრატორი, სასამართლო ან ბანკი ხშირად ნოტარიულ დამოწმებას ითხოვს: ნოტარიუსი თარჯიმნის ხელმოწერის ნამდვილობას ადასტურებს. თუ დოკუმენტი ჰააგის კონვენციის წევრ ქვეყანაში მიდის და მიმღები აპოსტილს ითხოვს, ნოტარიულ დოკუმენტზე აპოსტილს სახელმწიფო სერვისების განვითარების სააგენტო სვამს. დაწვრილებით: ნოტარიული დამოწმება და აპოსტილი.

ვადა და დიდი მოცულობა

ცალკეული ანგარიშგება, აუდიტის დასკვნა ან დეკლარაცია მზადდება იმავე ან მომდევნო დღეს. მრავალტომიან პაკეტზე, მაგალითად due diligence-ის მასალებზე, სამუშაოს ეტაპებად ვგეგმავთ თქვენი ვადის მიხედვით: პირველ ნაწილს იმავე ან მომდევნო დღეს მიიღებთ, დანარჩენს კი შეთანხმებული თანმიმდევრობით, რომ თქვენმა გუნდმა განხილვა ლოდინის გარეშე დაიწყოს.

რეგულარული თანამშრომლობისთვის, მაგალითად კვარტალური ანგარიშგებებისთვის, გლოსარიუმი და ფორმატი ერთხელ დგება, ყოველი მომდევნო ანგარიშგება კი იმავე ტერმინებით ითარგმნება.

როგორ ვიწყებთ თანამშრომლობას

ხშირად დასმული კითხვები

დაკავშირებული გვერდები