მომხმარებლის სახელმძღვანელოების და ინსტრუქციების თარგმნა

TARGMANEBI თარგმნის მომხმარებლის სახელმძღვანელოებს, ინსტალაციის და ექსპლუატაციის ინსტრუქციებს, უსაფრთხოების მითითებებს, გარანტიის ტალონებს და შეფუთვის ტექსტებს ქართულად. თარგმანი გიბრუნდებათ ორიგინალის განლაგებით, ბეჭდვისთვის მზა, იმავე ან მომდევნო დღეს.

ვისთვის არის ეს მომსახურება

• საყოფაცხოვრებო ტექნიკისა და ელექტრონიკის იმპორტიორები - ყოველ სეზონზე ათეულობით ახალი მოდელი და განახლებული ინსტრუქცია;
• რითეილ ქსელები - პროდუქტის ბარათები, შეფუთვის ტექსტები და გარანტიის პირობები ერთიანი ტერმინოლოგიით;
• სამრეწველო მოწყობილობების დისტრიბუტორები - ოპერირების, ტექნიკური მომსახურების და სათადარიგო ნაწილების კატალოგები;
• სამშენებლო მასალებისა და ინსტრუმენტების მომწოდებლები - მონტაჟის ინსტრუქციები და უსაფრთხოების მონაცემები;
• მწარმოებლები, რომლებიც საქართველოს ბაზარზე შემოდიან - ქართული ვერსია პროდუქტის გაშვებამდე.

სამედიცინო აპარატურის სახელმძღვანელოებს და ინტერფეისებს ცალკე პროფილის გუნდი თარგმნის: სამედიცინო აპარატურის ლოკალიზაცია.

რას მოითხოვს კანონი

საქართველოს კანონი "მომხმარებლის უფლებების დაცვის შესახებ" (2022 წლის 29 მარტი, №1455-VIII) პირდაპირ ადგენს ენის მოთხოვნას:

• მუხლი 5(1) - ხელშეკრულების დადებამდე მოვაჭრე ვალდებულია მომხმარებელს მიაწოდოს სანდო, სრული და მკაფიო ინფორმაცია ქართულ ენაზე, მათ შორის პროდუქტის ძირითადი მახასიათებლების შესახებ;
• მუხლი 25 - შეცდომაში შემყვან კომერციულ პრაქტიკად ითვლება, მათ შორის, მომხმარებლის პირად უსაფრთხოებასთან დაკავშირებული რისკის შესახებ ცრუ ინფორმაციის მიწოდება;
• მუხლი 34 - დარღვევისთვის ჯარიმას აკისრებს საქართველოს კონკურენციისა და მომხმარებლის დაცვის სააგენტო. ჯარიმის ზედა ზღვარია მოვაჭრის წინა ფინანსური წლის ბრუნვის 2%, ხოლო 12 თვის განმავლობაში განმეორებითი დარღვევისას ჯარიმა ორმაგდება.

ამას ემატება დარგობრივი ტექნიკური რეგლამენტები. მაგალითად, აირად საწვავზე მომუშავე მოწყობილობების ტექნიკური რეგლამენტი მწარმოებელს ავალდებულებს, მოწყობილობას დაურთოს ქართულ ენაზე შედგენილი ინსტრუქციები. მსხვილი იმპორტიორისთვის ეს ნიშნავს, რომ ქართული სახელმძღვანელო ერთჯერადი ამოცანა კი არა, მუდმივი საოპერაციო პროცესია.

რა შედის პაკეტში

როგორ ვმუშაობთ დიდ მოცულობაზე

ერთი ინსტრუქციის თარგმნა და 40 მოდელის სახელმძღვანელოს სეზონური პაკეტი სხვადასხვა ამოცანაა. დიდ მოცულობაზე სამუშაო ასე იგება:

• ფაილების ანალიზი - CAT ინსტრუმენტი ითვლის ახალ ტექსტს, ბაზაში უკვე არსებულ წინადადებებს და დოკუმენტებს შორის განმეორებებს. მაშინვე ჩანს, რომელი ნაწილი არის რეალურად ახალი;
• ტერმინოლოგიური ბაზა - ვაფიქსირებთ თქვენს ტერმინებს და ღილაკების სახელებს. თუ მოწყობილობის ეკრანზე ქართული ინტერფეისია, ინსტრუქციაში იგივე სიტყვები გამოიყენება;
• პარალელური თარგმნა - პაკეტი ნაწილდება რამდენიმე თარჯიმანზე, ყველა ერთ Translation Memory-სა და ტერმინოლოგიურ ბაზაზე მუშაობს;
• რედაქტირება და QA - რედაქტორი ამოწმებს ტერმინების ერთგვაროვნებას, რიცხვებს, ზომის ერთეულებს, მოდელის კოდებს და გამოტოვებულ სეგმენტებს;
• DTP - ქართული ტექსტი ბრუნდება InDesign, Illustrator ან PDF განლაგებაში. შრიფტი, სქემები და გვერდების რაოდენობა ორიგინალს ემთხვევა.

პაკეტის ჩაბარება ხდება მოდელებად ან თავებად, რომ თქვენმა გუნდმა შემოწმება და ბეჭდვაზე გაგზავნა პარალელურად დაიწყოს.

Translation Memory: შემდეგი სეზონი უფრო სწრაფად

ახალი მოდელის სახელმძღვანელო წინამორბედისას ხშირად დიდწილად იმეორებს: უსაფრთხოების თავი, გარანტია, მოვლა და ტექნიკური მომსახურება თითქმის უცვლელია. Translation Memory-ში შენახული ეს ბლოკები ავტომატურად ამოიცნობა და თარჯიმანი მხოლოდ ახალ მახასიათებლებზე მუშაობს.

• ნაკლები სამუშაო მოცულობა ყოველ მომდევნო პროექტზე;
• ერთნაირი ტერმინი ყველა ბრენდსა და პროდუქტის ხაზზე: მაცივრის, კონდიციონერის და სარეცხი მანქანის ინსტრუქციებში ერთი და იგივე ღილაკი ერთნაირად იწოდება;
• სწრაფი გაშვება - ქართული ვერსია მზადაა მაშინ, როცა საქონელი ჯერ კიდევ გზაშია;
• თქვენი ბაზა თქვენია - მოთხოვნისას Translation Memory-ს და ტერმინოლოგიურ ბაზას გადმოგცემთ სტანდარტულ TMX და TBX ფორმატებში.

რატომ არ კმარა "დაახლოებითი" თარგმანი

ინსტრუქციაში შეცდომა მომხმარებლის უსაფრთხოებას ეხება. "Do not immerse in water" თუ ითარგმნა როგორც "არ დაასველოთ", ინსტრუქცია სხვა რისკზე საუბრობს: ჩაძირვა და დასველება უსაფრთხოების სხვადასხვა ზღვარია. "Grounded outlet" რომ "მიწის როზეტად" იქცევა ნაცვლად "დამიწებული როზეტისა", ელექტრიკოსიც კი შეცდება.

ასეთ შეცდომებს ვამოწმებთ სამი ფილტრით:

• ტერმინოლოგია - ელექტროტექნიკის, თბოტექნიკის და მექანიკის დამკვიდრებული ქართული ტერმინები;
• ერთეულები და რიცხვები - ვოლტი, ვატი, ბარი, °C და ზომის ერთეულები უცვლელად, ათწილადები ქართული ნორმით;
• მკითხველი - ტექსტი იწერება იმ მომხმარებლისთვის, რომელიც ინსტრუქციას ხელში იჭერს და არა ინჟინრისთვის.

უსაფრთხოების დონეები მთელ პაკეტში ერთნაირად ითარგმნება: WARNING - "გაფრთხილება", CAUTION - "სიფრთხილე", NOTICE - "შენიშვნა". მომხმარებელი რისკის სიმძიმეს სწორედ ამ სიტყვით ცნობს, ამიტომ ორი დონე ერთ სიტყვაში არასდროს ერთიანდება.

ფორმატები და DTP

სახელმძღვანელო გიბრუნდებათ იმავე ფორმატში, რომელშიც გამოგვიგზავნეთ, და მზადაა ბეჭდვისთვის ან საიტზე ატვირთვისთვის:

• PDF, მათ შორის მხოლოდ PDF, წყარო ფაილის გარეშე;
• Adobe InDesign (INDD, IDML), Illustrator (AI), FrameMaker;
• Word, Excel, PowerPoint;
• XML, HTML და ონლაინ help-ცენტრის ექსპორტი;
• შეფუთვის მაკეტები და ეტიკეტების ფაილები.

ქართული ტექსტი ინგლისურზე ხშირად გრძელია, ამიტომ DTP სპეციალისტი ასწორებს ტექსტურ ბლოკებს, სქემების წარწერებს და გვერდების გადასვლას. ლათინური შრიფტი ქართულ ასოებს არ შეიცავს, ამიტომ ვარჩევთ ორიგინალის სტილთან ახლოს მდგომ ქართულ შრიფტს. ნახაზებიანი სახელმძღვანელოების შემთხვევაში იხილეთ როგორ ითარგმნება PDF და AutoCAD ნახაზები ფორმატის დაკარგვის გარეშე.

არსებული ქართული ინსტრუქციების შემოწმება

ბევრ იმპორტიორს თაროზე უკვე აქვს ქართული ინსტრუქციები, რომლებიც მწარმოებელმა ან წინა მომწოდებელმა მოამზადა. ხშირად ეს მანქანური თარგმანია: გრამატიკულად გაუმართავი, არაერთგვაროვანი ტერმინებით და გამოტოვებული გაფრთხილებებით. ასეთ შემთხვევაში ყველაფრის თავიდან თარგმნა აუცილებელი არ არის.

• შემოწმება ორიგინალთან - რედაქტორი ადარებს ქართულ ტექსტს დედანს და ნიშნავს შინაარსობრივ შეცდომებს, გამოტოვებებს და ტერმინების შეუსაბამობას;
• პრიორიტეტები - პირველ რიგში სწორდება უსაფრთხოების მითითებები, ინსტალაცია და ელექტრო კავშირი, შემდეგ კი დანარჩენი ტექსტი;
• ბაზაში გადატანა - გასწორებული ტექსტი Translation Memory-ში ინახება და შემდეგ მოდელებზე უკვე სწორი ვერსია მეორდება.

რედაქტირების ზოგადი პრინციპები: რედაქტირება და კორექტურა.

ენები და კონფიდენციალურობა

ყველაზე ხშირად ვთარგმნით ინგლისურიდან, რუსულიდან, თურქულიდან, გერმანულიდან, იტალიურიდან და ჩინურიდან ქართულად. ჩინურენოვან ინსტრუქციას ვთარგმნით პირდაპირ, შუალედური ენის გარეშე. საჭიროების შემთხვევაში ქართული ვერსიის პარალელურად ვამზადებთ რუსულ ვერსიასაც, იმავე ტერმინოლოგიური ბაზით.

გამოუშვებელი მოდელის ინსტრუქცია კომერციული საიდუმლოებაა. ფაილებზე წვდომა აქვთ მხოლოდ პროექტზე მომუშავე თარჯიმნებს, მოთხოვნისას ვაფორმებთ NDA-ს. დეტალურად: კონფიდენციალურობის პოლიტიკა.

როგორ შევუკვეთოთ

ხშირად დასმული კითხვები

დაკავშირებული გვერდები