ნიშნების ფურცლისა და დიპლომის დანართის თარგმნა

ნიშნების ფურცელი ჩვეულებრივი ტექსტი არ არის. ეს არის ცხრილი, რომელშიც ათობით საგანი, კრედიტი, ქულა და თარიღია, და თითოეულ სტრიქონს თავისი მნიშვნელობა აქვს. თარჯიმნის ამოცანაა, რომ თარგმანი დედანთან გვერდიგვერდ დადებისას სტრიქონ-სტრიქონ ემთხვეოდეს, და შემმოწმებელს ერთი წამითაც არ გაუჩნდეს კითხვა, ის ხედავს თუ არა იმავე დოკუმენტს.

ქვემოთ აღწერილია, რას შეიცავს დანართი, სად ჩნდება შეცდომები ყველაზე ხშირად და როგორ ვამოწმებთ თითოეულ რიცხვს. თარგმანი მზადდება იმავე ან მომდევნო დღეს, საჭიროების შემთხვევაში ნოტარიული დამოწმებით.

რას შეიცავს დიპლომის დანართი

ბოლონიის მოდელის დიპლომის დანართი (Diploma Supplement) 8 ნაწილისგან შედგება და თითოეული ითარგმნება სრულად:

1. კვალიფიკაციის მფლობელის მონაცემები;
2. კვალიფიკაციის დასახელება და გამცემი დაწესებულება;
3. კვალიფიკაციის დონე და პროგრამის ხანგრძლივობა;
4. პროგრამის შინაარსი და მიღებული შედეგები - აქ არის საგნების ცხრილი;
5. კვალიფიკაციის ფუნქცია, მაგალითად სწავლის გაგრძელების უფლება;
6. დამატებითი ინფორმაცია;
7. დამოწმება - ხელმოწერა, ბეჭედი, თარიღი;
8. ეროვნული უმაღლესი განათლების სისტემის აღწერა.

დანართი ხშირად 4-დან 10 გვერდამდეა. ნიშნების ფურცელი და აკადემიური ცნობა უფრო მოკლეა, მაგრამ იგივე ცხრილოვან სირთულეს ატარებს. მე-8 ნაწილიც, რომელიც ქართული უმაღლესი განათლების სისტემას აღწერს, ითარგმნება: სწორედ ის ეხმარება უცხოელ შემმოწმებელს, გაიგოს ქართული საფეხურები და კრედიტები.

დანართი, ნიშნების ფურცელი თუ აკადემიური ცნობა

სამი დოკუმენტი ხშირად ერთმანეთში ერევათ, თუმცა მიმღები სხვადასხვა სიტუაციაში სხვადასხვას ითხოვს:

• დიპლომის დანართი გაიცემა დიპლომთან ერთად, სწავლის დასრულებისას. ის მოიცავს მთელ პროგრამას და ეროვნული სისტემის აღწერას;
• ნიშნების ფურცელი არის საგნებისა და შეფასებების ჩამონათვალი. ძველ დიპლომებთან ის დანართის როლს ასრულებს;
• აკადემიური ცნობა გაიცემა სწავლის პროცესში - მაგალითად, როცა სხვა უნივერსიტეტში გადადიხართ და დიპლომი ჯერ არ გაქვთ. ის აჩვენებს მხოლოდ უკვე გავლილ საგნებს.

სამივე ერთნაირი სიზუსტით ითარგმნება. თუ არ იცით, რომელი გჭირდებათ, გამოგვიგზავნეთ მიმღების მოთხოვნის ტექსტი: უცხოურ ინსტრუქციაში დანართს ჩვეულებრივ Diploma Supplement ჰქვია, ნიშნების ფურცელს ან ცნობას კი Transcript of Records.

ვის სჭირდება ნიშნების ფურცლის თარგმანი

• უცხოეთის უნივერსიტეტებს - მაგისტრატურაზე ან დოქტორანტურაზე ჩაბარებისას და სხვა უნივერსიტეტში გადასვლისას;
• აღიარების ცენტრებს - მიმღები ქვეყნის ENIC-NARIC ცენტრი კვალიფიკაციის შეფასებისას საგნებსა და კრედიტებს ადარებს;
• დამსაქმებლებსა და ლიცენზირების ორგანოებს - განსაკუთრებით რეგულირებად პროფესიებში, სადაც კონკრეტული საგნების გავლაა მოთხოვნილი;
• საელჩოებს - სტუდენტური ვიზის განაცხადისას;
• განათლების ხარისხის განვითარების ეროვნულ ცენტრს - თუ უცხოური ნიშნების ფურცელი საქართველოში უნდა აღიაროთ. დაწვრილებით: უცხოური დიპლომის აღიარება.

საგნების სახელწოდებები

„სამოქალაქო სამართლის ზოგადი ნაწილი“ და „სამოქალაქო სამართალი“ სხვადასხვა საგანია. მიმღები უნივერსიტეტი საგნის სახელს თავისი პროგრამის საგნებს ადარებს, ამიტომ სახელი სრულად და დარგის ტერმინოლოგიით ითარგმნება, შემოკლებისა და განზოგადების გარეშე.

თუ ერთი და იგივე საგანი დანართში, ნიშნების ფურცელსა და სილაბუსში სხვადასხვანაირად ჩაიწერა, კრედიტის აღიარება ფერხდება: შემმოწმებელი ვერ ხვდება, ერთსა და იმავე კურსზეა საუბარი თუ ორზე. ამიტომ საგნების სახელებს ვინახავთ ერთიან ტერმინების სიაში, რომელიც ვრცელდება თქვენს ყველა სასწავლო დოკუმენტზე, მათ შორის სილაბუსების თარგმანზე.

თუ უნივერსიტეტს საგნის ოფიციალური ინგლისური სახელწოდება აქვს და ის ინგლისურენოვან დანართში ან პროგრამის აღწერაში ჩანს, თარგმანში სწორედ ამ ფორმას ვიყენებთ.

ECTS კრედიტები და ჯამები

კრედიტი ითარგმნება ზუსტად ისე, როგორც დედანშია, დამრგვალებისა და გადაანგარიშების გარეშე. ჩვეულებრივ აკადემიური წელი 60 კრედიტია, ხოლო მაგისტრატურა 120 კრედიტი. ცხრილის ბოლოს მითითებული ჯამი ყოველთვის უნდა ემთხვეოდეს საგნების კრედიტების ჯამს.

ამას თარგმნის შემდეგ ცალკე ვამოწმებთ: ჯამს ხელახლა ვითვლით და ვადარებთ დედანს. თუ დედანშივე არის შეუსაბამობა, არ ვასწორებთ - თარგმანი დოკუმენტს ასახავს, არა მას, რაც უნდა ეწეროს. ასეთ შემთხვევაში გატყობინებთ, რომ საჭიროების შემთხვევაში უნივერსიტეტს სწორი ცნობა მოსთხოვოთ.

შეფასების სისტემა

ქართულ უნივერსიტეტებში მოქმედებს 100-ქულიანი სკალა, და თარგმანში თითოეული შეფასება ასე გადმოიცემა:

• 91-100, A - ფრიადი - Excellent;
• 81-90, B - ძალიან კარგი - Very Good;
• 71-80, C - კარგი - Good;
• 61-70, D - დამაკმაყოფილებელი - Satisfactory;
• 51-60, E - საკმარისი - Sufficient;
• 41-50, FX - ვერ ჩააბარა - Marginal Fail;
• 0-40, F - ჩაიჭრა - Fail.

ქულას და ასოს არ ვცვლით და არ გადაგვყავს სხვა ქვეყნის სისტემაში. გადაყვანას მიმღები ორგანო აკეთებს საკუთარი მეთოდოლოგიით. თუ თარჯიმანი თავისით „გადაიყვანს“ შეფასებას გერმანულ 1-5 ან ამერიკულ GPA სისტემაში, თარგმანი დედანს აღარ შეესაბამება და დაბრუნების საფუძველი ხდება.

საბჭოთა და 2005 წლამდელი ნიშნების ფურცლები

ძველ ფურცლებში (рус. „вкладыш к диплому“) კრედიტების ნაცვლად საათებია, შეფასება კი 5-ბალიანი: „отлично“, „хорошо“, „удовлетворительно“, „зачтено“. საათებს საათებად ვტოვებთ და კრედიტებად არ ვაქცევთ, შეფასებას კი ვთარგმნით როგორც Excellent (5), Good (4), Satisfactory (3) და Pass.

ასეთი ფურცლები ხშირად რუსულ ან ქართულ-რუსულ ენებზეა, ხელნაწერი ჩანაწერებითა და გაცრეცილი ბეჭდებით. თუ რომელიმე ჩანაწერი ვერ იკითხება, თარგმანში ამას ვუთითებთ და არ ვხვდებით - ეს ოფიციალური თარგმანის მოთხოვნაა. დაწვრილებით საბჭოთა დიპლომების თავისებურებებზე: დიპლომის თარგმნა.

როგორ ვამოწმებთ სიზუსტეს

• ცხრილის სტრუქტურა უცვლელია. სვეტების რიგი, სტრიქონების რაოდენობა და გვერდების დაყოფა დედანს მიჰყვება, რომ შემმოწმებელმა ორი დოკუმენტი გვერდიგვერდ შეადაროს;
• ტერმინების ერთიანი სია. უნივერსიტეტის, ფაკულტეტისა და პროგრამის სახელები ემთხვევა თქვენი დიპლომის თარგმანს;
• რიცხვების ცალკე შემოწმება. თარგმნის შემდეგ ყოველი კრედიტი, ქულა და თარიღი დედანთან სტრიქონ-სტრიქონ მოწმდება, ჯამები კი ხელახლა ითვლება;
• სახელი და გვარი იწერება ზუსტად ისე, როგორც პასპორტში;
• ბეჭდები და ხელმოწერები აღინიშნება თარგმანში მათი ადგილის მითითებით;
• AI არ გამოიყენება კლიენტის დოკუმენტის შინაარსზე.

თუ ჩაბარებულ თარგმანში ჩვენი შეცდომა დადასტურდება, ვასწორებთ იმავე ან მომდევნო სამუშაო დღეს. დეტალურად: ხარისხის კონტროლი.

ნოტარიული დამოწმება და აპოსტილი

უნივერსიტეტისა და აღიარების ორგანოსთვის დანართის თარგმანი, როგორც წესი, ნოტარიულად მოწმდება: ნოტარიუსი ადასტურებს თარჯიმნის ხელმოწერის ნამდვილობას. თუ აპოსტილი გჭირდებათ, ის ორიგინალ დანართზე თარგმნამდე უნდა დაისვას, რომ აპოსტილის ტექსტიც თარგმანში აისახოს.

დიპლომი და დანართი ცალკე დოკუმენტებია და თითოეულს ცალკე აპოსტილი სჭირდება. საგანმანათლებლო დოკუმენტზე აპოსტილის კომპეტენტური ორგანოა განათლების ხარისხის განვითარების ეროვნული ცენტრი, განაცხადი კი იუსტიციის სახლში შეგაქვთ. ნაბიჯ-ნაბიჯ: როგორ გავაკეთოთ აპოსტილი დიპლომსა და ნიშნების ფურცელზე.

ერთი პრაქტიკული რჩევა: ბევრი ქართული უნივერსიტეტი დანართს ინგლისურადაც გასცემს. თუ ინგლისურენოვანი დანართი გაქვთ და მიმღები ინგლისურს იღებს, შეიძლება თარგმანი საერთოდ არ დაგჭირდეთ. ჯერ ეს შეამოწმეთ.

ვადა

ნიშნების ფურცლისა და დიპლომის დანართის თარგმანი მზადდება იმავე ან მომდევნო დღეს, ნოტარიული დამოწმების საჭიროების შემთხვევაშიც. თუ დიპლომსაც ერთად გამოგზავნით, ყველა დოკუმენტს ერთად მიიღებთ, ერთიანი ტერმინოლოგიით.

როგორ შევუკვეთოთ

ხშირად დასმული კითხვები

დაკავშირებული გვერდები